Скачать PDF https://bibl-kostroma.ru/wp-content/uploads/2018/10/Skazaniye-Blazhennomu-Simonu-Yuryevetskomu_-rukopis.pdf
Сия рукопись принадлежит Анне Ивановне Корепоровой
Сказание когда и коея ради вины написаны быша Блаженному Симону Юрьевецкому Чудотворцу Тропарь, Кондак со Икосом и Молитва. Тропарь.
Сей Кондак со Икосом, такожде и Молитва Блаженному Симону написашася в лето от воплощения Божия Слова 1698 тщанием и верою Богоявленскаго Монастыря Игумена Стефана и Священников, якоже они сами в слогах и речениях опасно чрез совесть определившее изложиша. Бысть же сим написание вины ради сицевыя, понеже убо отнелиже благоволением Божиим по благословению блаженныя памяти Виликаго Господина Святейшаго Иоасафа Патриарха Московскаго и всея России, начаша Блаженнаго Симона образ иконным воображеним писати: оттоле тогда бывши игумени и священницы написаша Блаженному Тропарь и Кондак, якоже и вси ведят нынешнии Священницы и Парохиане и от Граждан мнози; понеже той Тропарь и Кондак написаны были на едином листе и наклеены на досце и поставлены были в церкви Богоявления Господня над Гробом Блаженнаго Симона на Гробнице при Чудотворной Его первописанной Иконе ради прочитания приходящих. Егдаже изволением Божиим грех наших ради в прешедшем от воплощения Жизнодавца 1694 лете июлия 31 день та вышереченная Богоявления Господня Церковь внезапу со всею утварию згоре: тогда и Чудотворная та Икона стоящая на Гробнице и при Ней Тропаря и Кондака написание згоре; А каковым слога образом той Тропарь и Кондак были написаны, о том последи никоеяже ведомости обретеся, ниже в Церквах Божиих, ниже в домех у кого преписания, ниже наизусть умеющих кто суть во граде: негли Христову речению на нас исполняющемуся, несть Пророк без чести токмо во отечествии своем, или якоже бо от терния небывают грозды, ни от волчца смоквы: тако и в нас аки и добру бытии невозможно: яве бо есть яко в толиких летех ихже четырех сот: от нелиже Град начало бытия своего прият эдин светильник точию в нем явися, мы же и того под спуд лености, и нерадения, и безверия, или высокоумия скрываем, и по Златоустаго речению: обычаем чудо изменяем: Ибо воистину чудо во граде нашем Блаженный Симон ради жития Его святаго и чудес Его деля: но мы чудо сие аки во обычай изменихом, до толика яко ниже Тропарь и Кондак вемы, как обе и Сограждане Его сущее. От сего убо стыд презрения ради нас преследует: яко невнимающим, ниже помышляющим нам Святых, и нам винословием: якоже о своих согражданех пекущееся глаголющее: аще инии власти вашей причащаются, не пачели мы, аки бы глаголати им о самовластии нас них по Бозе уповающих: зане о них своим предстательством купно со Ангелы Хранители нашими самовластие наше невидимо руководят от злобы и направляют ко благости по дерзновенному глаголу Их ко Господу: научу беззаконныя путем и нечестивии к Тебе обратятся, или сице глагол сей рещи: аще инии святии от вас молитвенницы, не паче ли мы яко о своих си. Сие же сего ради речеся: да не како кто вознепщует о нынешнем, Тропаря и Кондака, ктомуже Икоса и молитвы, написании: яко новину внесших, и речет: яко же прежде не бе, то сотвориша: и укорит устроивших сие Игумена и при нем сущии освященный Чин: яко горделивых; и сим Святаго Симона вместо еже прославити: то, аки несть еще достойна Тропарем же и Кондаком якоже и прочии Святии почитатися, сотворит: понеже в роде сем прекословцы и завистницы, и соделанному готовии разрушители бывают, и сладкое горьким называют презорством, завистию, и прекословием одержими: ибо не яко дерзновенно и славолюбия ради, ни якоже прилучися Святому и Блаженному Светильнику града нашего Симону; обычныя сия по уставу Церкви молебныя похвалы написашася: но последовав Прежних преданию: занеже по писанному: память праведнаго с похвалами: похвала же праведнику никогда от человек: но от имущаго души их в руце, си устрояется; сего ради и неугаснет николиже: якоже зрим ясно и о прославленном от Бога Чудотворце Симоне: яко толико Того Бог прослави, яко присно изцеления подает с верою призывающим Его в помощь, наипаче посельне, иже просту веру имут, яковуюж любит Бог и Угодницы Его, Аминь.
Тропарь глас 8.
Яко воистину гласа Апостальскаго послушатель был еси Блаженне Симоне: Христа бо ради изволив имети буйство, в нем же соблюл еси твоя к Богу добродетели посреде молв некрадомы. Терпением убо паче естественным Христа подражав посрамил еси льстиваго всю гордыню, тем и в лютых ранах, якоже древний Лазарь и недра Авраамля преселился еси: идеже ныне утешаяся, посещай град твой почитающий любовию святую память Твою.
Кондак глас 4.
Возгоревся рачением горним жестость вольнаго юродства паче всех сладких мира предпочел еси: от онудуже повинуся Ти огнь от егоже запаления град твой Юрьевец избавил если, и воды немокренно, яко по суху прешел если, и хотящая бытии предрекл еси: прославльшу тя тако Богу к Нему же моляся, и о нас поющих тя, Блаженне Симоне, поминай.
Икос
Иже до третияго небесе, восхищенный в рай сокровищу духовному в скудельных сосудех обретатися сказует: образно предначерта буйство, еже нецыи возымеша Святии: в нем же сокровище божественных деяний неявленне соблюдоша. От них же Симон Юрьевецкий в вольном своем юродстве небеснаго Бога Отца Ипостасней мудрости и силе, паче всякаго плодоприношения плоды жития своего, яже стяжа во трудех, бдениях же и слезах, во гладе и жажди, зиме и наготе, пханиях, руганиях же принесе. Его же Избавитель, от мира яко юрода, избра Ему суща премудра, и прослави. Прочая же услышите, елика дивный сей, мертвость Господа и небеса нося чудодействова в житии своем, паче и по преставлении присно точит цельбы, к Нему же мы прилежно воззовем: Блаженне и праведнее Симоне, ко Господу моляся, и о нас хвалящих Тя поминай.
Молитва Блаженному Симону.
О Всесвятыя Живоначальныя, Нераздельныя, Единопрестольныя, Единосущныя и Единославныя Троицы, истинный Угодниче, и верный Рабе, Блаженне и Приснопамятне Симоне, о избранниче Божий, аще и миру яко урод бывый, но премудрым житием твоим удивляяй, О небесных сил Сликовниче, аще и худородный миру, и уничиженный бывый, за неявленность ему благих твоих детелей; тяготу дне, и вар солнечный, и зимнии мразы понесый: заповеди христианския совершивый: присную брань к началом и властем и миродержителем тьмы века сего имевый: Блаженнаго Андреа подражателю, вся света сего яко уметы вменивый: иже и слова и молчания меру, со иными Твоими добрыми изрядне почтивый. Евангельскаго жития изследителю: прославленный от Бога чудесы не точию в животе твоем: но и по смерти, яже честна пред Ним явися: понеже убо Тя яко доблественна страдальца, и врагу одолетеля честне преложи душею в небесный покой: тело же твое терпеливое граду Юрьевцу преподаде во еже при нем полезная нам ощущати, по реченному: о рабех своих умолен будет: О Преукрашенный добродетельми дивный Чудотворче Симоне, блаженства наречение в лепоту имеяй: понеже вси присно блажим Тя, и блажити будем. Предублаженнаго, блаженны содевающим Иисусом: не яко к Тебе самому рекшу ему: блажен еси Симоне, но яко подобну ты оному, каменю сущу веры, или другому тезоименитому Тебе в нем же льсти истина необрете, нечто содеял если. Поревновав бо и Ты о нех, вкупе и всех Праведных блаженству оставил если вся, яже суть мира сего преходящая, и во след вечныя нашея радости и воскресения, всесладчайшаго Иисуса, Иже сый сияние славы Отчи и Образ Ипостаси Его, Иже сый воистину весь желание, весь сладость, иже бысть нам премудрость от Бога Отца, правда же, и освящение, и избавление, потекл еси: и достигл если [того всесильною помощию] даже до горняго сиона, идеже веселящихся есть жилище, отнюдуже отбеже болезнь, печаль и воздыхание, ублажающе же Тя прилежно молим праведнее Человече Божий, призри на ны во многая искушения впадающая, моли о нас неизреченную всех человек радость и упование человека неизглаголаннаго ради милосердия бывша, собезначальнаго Отцу и Духу, Единороднаго Сына и Слова Божия, да не оставит ны прогневляющия Его непамятозлобное благоутробие, без своего божественнаго тайноводительства; и вся на пользу нам да устроит: и да утвердит ны во своей православной истиной и непорочной вере непоколебимы, и вся ны своими праведными судьбами спасет: и да не оставит ны искуситися, паче же можем, но сотворит со искушением и избытие, яко возмощи нам понести: бед же и печалей, болезней же и озлоблений присно на ны зде грех ради наших бывающих, милостивно да избавит: и да достойны покажет ны наследники бытии царствия своего небеснаго. Ей молим Тя рабе Христов якоже призирал еси в жизни своей на требующих помощи. О не остави и ныне нас Тебе молящихся, предстани о нас ко Господу, и от всяких напастей и болезней молитвами твоими изми ны: к сему же еще молим Тя Блаженне, умоли Преблагословенную всех человек надежду и Предстательницу, Владычицу нашу Богородицу, Святых всех Царицу, христианскую радость, и славу и похвалу, и необуреваемое пристанище, от гнева Божия милостивную защитницу, всех нас мост к небеси приводящий, да умилосердится милосердия сущии Источник, беды наша и прочия страсти душевныя купно и телесныя видящи благоутробно к Сыну своему и Богу заступит: весть бо Она яко Вседержительница тварей еликими обстоимы есьмы злыми, но и мы веемы, яко аще не бы она Заступница наша предстояла о нас молящи Сына своего и Бога, кто бы нас избавил от толиких бед. Сего ради Ты раб Ея истинный, стяжавй Ю в жизни сей твоему праведному житию окормительницу, и дерзновение ныне к Ней имеяй, присно о нас грешных молящийся Ей буди: и с Нею всенадежно ко всеблагому и премилостивому Сыну Ея Христу Богу нашему, молитву сотвори: да избавит вся правоверныя, купно же и притекающия ко гробу твоему, и вся во всех нуждах, белезнех же и печалех, бедах же и скорбех пребывающия от всех обстояний их: и твой сей град, в нем же добродетельно пожив Богу угодил еси, избавит от всех навет вражиих, и да достойны вся ны покажет вечныя жизни. Паки молим Тя Блаженне Симоне не оставиипосещай ны чтущия Ты во всех наших требованиих, да Тобою заступаеми, выну прославляем Христа Бога нашего, даровавшаго нам Тя Предстателя теплаго, яко Тому подобает всякая слава, честь и поклонение, со Отцем и Святым Духом, ныне и присно, и во веки веков. Аминь.
Комментариев нет:
Отправить комментарий