Возсия нам яко солнце светозарное Твоя, Владычице, благодати причастная икона, к нейже мы умильно взирающе, величаем Твое к нам матернее благоутробие, и купно от Тебе рождшегося Бога славим, спасающего Тобою души наша.
Молитва ко Пресвятой Богородице пред святой чудотворной Иерусалимской Её иконой, яже обретается на святой горе Афонской в Русском Пантелеимоновом монастыре
О, Пресвятая и Преблагословенная Мати Господа и Спаса нашего Иисуса Христа, пречистая Приснодево Богородице Марие, святой обители нашей и всей горы Афонской державная покровительнице и заступнице! Припадаем и поклоняемся Тебе пред святою и чудотворною Иерусалимскою Твоей иконою, Юже (Сама) даровати святей обители нашей благоволила еси и тою многие милости и щедроты Твоя нам явила еси и являти непрестаеши! Смиренно молимся Тебе, благой и милосердой Предстательнице нашей: вонми гласу молитв наших, не презри воздыханий наших от души, виждь скорби и искушения наша, и яко воистину любвеобильная Матерь, потщися помощи нам беспомощным, унылым, во многие грехи впадающим и присно прогневляющим Господа и Создателя нашего, егоже умоли, Владычице, да не погубит нас со беззаконии нашими, но, ради Твоего предстательства, явит нам человеколюбную Свою милость. Испроси нам, Всеблагая, у благости Его здравие душевное и телесное, покаяние во гресех совершенное, преуспеяние в добродетелех христианских, благодатное, мирное и благочестное житие, земли плодоносие, воздуха благорастворение, дожди благовременны и благословение свыше на все благие дела и начинания наша. Обитель сию святую, именем Твоим освящённую и иконой Твоей облагодатствованную, сохрани и соблюди в мире и благоустроении, и споспеши нам всем нести иго Христово благое и лёгкое, в терпении и смирении, во спасение душ наших, ограждая нас матерним покровом Твоим от искушений диавольских, и всякого зла. О, Царице всепетая, Мати Божия всеблагая! Простри богоносные руце Твои на умоление к возлюбленному Сыну Твоему, Господу нашему Иисусу Христу, и прием сомолитвенники к Нему, вкупе с Тобою на иконе Твоей изображённые, праведные родители Твоя Иоакима и Анну, с ними умоли Его помиловати нас и избавити от погибели вечной. И якоже иногда в скорби велицей пред сей иконой Твоей молившемуся Нилу, утешение и обетование благое даровала еси, тако и ныне нас смиренных и грешных, молящихтися, услыши и яви нам великие Твоя щедроты: болящие исцели, скорбящие утеши, бедствующие от бед избави, путешествующие и мореплавающие невредимы сохрани, и вся ны сподоби благочестно житие наше земное скончати, благую, христианскую и Святых Таин причастную кончину получити, и небесное Царствие Христово унаследовати: да во свете и радости святых поем и величаем милосердие Твое и рождшегося от Тебе Господа нашего Иисуса Христа, Емуже со безначальным Его Отцем и Пресвятым Духом подобает всякая слава, честь и поклонение во веки веков. Аминь.
Празднование Пресвятой Богородице ради Иерусалимской Её иконы – 12 / 25 октября. На этот день в Пантелеимоновом монастыре отправляется торжественно всенощное бдение по нарочно составленной службе в честь чудотворного образа, посланного иеросхимонахом Нилом.
Чтоб сказать что-либо о благодетельном пребывании «благодати причастной» Иерусалимской иконы в Русской на Афоне обители, для этого выписывается здесь несколько тропарей из канона на сей праздник, указывающих на милостивое примышление Матери щедрот о месте, в котором Она возблаговолила пребывать святым образом.
«Приимше от раба Твоего благодатию сияющий образ Твой, Чистая, прияхом той аки от Твоих рук в благословение созидавшемуся тогда храму Покрова Твоего, и с явлением иконы и украситель Дома Твоего явися, емуже подала еси благопоспешение».
«Недоумеем благодарити Тя, Благословенная, якоже подобает, како беспомощные иногда обители сея явилася еси скорая помощница. Славим убо Твое о нас примышление».
«Отъяла еси пришествием в обитель святого образа Твоего, всеблагая Дево, от рабов Твоих уныние и окружавшие нас преграды и вместо сих радость и благоденствие стаду Твоему даровала еси. Слава Твоему о нас смотрению».
«В знамение покрова Богоматере облагодатствованный образ Её имуще, возложим упование наше на Ню, не предающеся малодушию в скорбях: Царица бо небесе и земли необоримая есть нам защита».
«Радуйся, Мати Живота, благодати сподобляющая рабы Твоя: радуйся освящение поющих державу Твою непобедимую, и пресветлого лица Твоего и славных Богоотец честное подобие почитающих».
Источник информации:
Комментариев нет:
Отправить комментарий